Кондак 1
Избра́нный служи́телю Христо́в, во дни гоне́ний в со́нме новому́ченик просия́вый, страстоте́рпче и испове́дниче о́тче Се́ргие, крест свой прие́м, к по́двигу неукло́нно ше́ствоваше стезе́ю спаси́тельною, ны́не же ве́лие дерзнове́ние имы́й ко Го́споду, моли́ спасти́ся нам, ча́дом твои́м, с ве́рою зову́щим ти:
Ра́дуйся, священному́чениче Се́ргие, па́стырю богому́дре.
Икос 1
А́нгелов Творе́ц и всея́ тва́ри Соде́тель, провести́ хотя́ лю́ди Cвоя́ сквозе́ волня́щееся мо́ре гоне́ния, укрепля́ше ве́рныя служи́тели Своя́ на по́двиг му́ченический, с ни́миже вку́пе еси́, пресла́вне Се́ргие, о́трасль сый блага́я от дре́ва до́браго, в ве́ре, наде́жде и любви́ прозя́бшая. Те́мже прему́дрость Всевы́шняго сла́вяще, гла́сом ра́дования воспева́ем ти си́це:
Ра́дуйся, отроча́, Бо́гом избра́нное;
ра́дуйся, измла́да в ве́ре наста́вленный.
Ра́дуйся, к го́рнему ум впери́вый;
ра́дуйся, высоту́ слу́жбы церко́вныя се́рдцем позна́вый.
Ра́дуйся, сослужи́телю ве́рный ста́рца свята́го;
ра́дуйся, досто́йный сы́не того́ и прее́мниче.
Ра́дуйся, драгоце́нный сосу́де, благода́ти испо́лненный;
ра́дуйся, свя́тости отца́ своего́ насле́дниче.
Ра́дуйся, священному́чениче Се́ргие, па́стырю богому́дре.
Кондак 2
Ви́дя па́стырское служе́ние роди́теля своего́, пра́ведного Алекси́я, в горе́нии ко Го́споду и же́ртвенней любви́ к лю́дем неослабева́ющаго, бли́зость Бо́жию я́ве позна́л еси́ и кре́пко в ве́ре и доброде́тели утверди́лся еси́, со святы́м ста́рцем поя́ согла́сно Бо́гу: Аллилу́иа.
Икос 2
Ра́зумом чи́стым разуме́я па́губу лжеуче́ний безбо́жнических, доброглаго́ливе Се́ргие, па́ству свою́ тве́рдо защища́ше и лю́дие увещева́ше греха́ отвраща́тися, сего́ ра́ди пое́м ти сицева́я:
Ра́дуйся, от Го́спода дарова́ний ще́дро испо́лненный;
ра́дуйся, вся сия́ на служе́ние Ему́ поста́вивый.
Ра́дуйся, от пути́ угото́ваннаго не уклони́выйся;
ра́дуйся, в де́лании духо́внем ре́вностно подвиза́выйся.
Ра́дуйся, я́ко вы́ну пред Бо́гом ходи́ти навы́кл еси́;
ра́дуйся, я́ко в го́ды гоне́ний и́го па́стырскаго служе́ния подъя́л еси́.
Ра́дуйся, учениче́ святы́х оте́ц усе́рдный;
ра́дуйся, ве́рность Христу́ до конца́ сохра́нший.
Ра́дуйся, священному́чениче Се́ргие, па́стырю богому́дре.
Кондак 3
Си́лою, свы́ше ти да́нною, превы́шшую сил челове́ческих но́шу подъя́л еси́, о́тче, по преставле́нии отца́ своего́ пра́веднаго Алекси́я взем общи́ну его́ на ра́мена своя́; призыва́ше всегда́ лю́дие люби́ти друг дру́га по сло́ву Ева́нгельскому, да, в покая́нии и служе́нии Бо́гу пребыва́юще, еди́ными усты́ и еди́ным се́рдцем славосло́вят Еди́наго в Тро́ице Бо́га: Аллилу́иа.
Икос 3
Имы́й ве́лие попече́ние о па́стве, Бо́гом ти вве́ренней, ну́жды чад свои́х приима́ше я́ко своя́, се́мена доброде́телей усе́рдно се́я в сердца́ их, моли́твою и слеза́ми оби́льно ороша́я, в терпе́нии плод возрасти́л еси́. Мы же, ви́дяще общи́ну твою́, ве́рность Христу́ и едине́ние в го́ды гоне́ний сохра́ншую, благода́рственная воспева́ем ти:
Ра́дуйся, благонра́вия возде́лывателю;
ра́дуйся, любвеоби́льный па́стырю.
Ра́дуйся, иконописа́ния и пе́ния церко́внаго храни́телю;
ра́дуйся, уста́ва богослуже́бнаго ревни́телю.
Ра́дуйся, и́стины богосло́вия се́рдцем позна́вый;
ра́дуйся, в ве́ре и богопозна́нии ча́да своя́ утвержда́вый.
Ра́дуйся, жития́ святы́х прочи́тывати дея́ньми науча́вый;
ра́дуйся, та́йну ве́лию богослуже́ния ча́дом изъясня́вый.
Ра́дуйся, священному́чениче Се́ргие, па́стырю богому́дре.
Кондак 4
Бу́ре ве́тров злых, Святу́ю Це́рковь обурева́ющих, благода́тию уче́ния святооте́ческаго противустоя́ше, о́тче прему́дре, уча́ па́ству свою́ в слу́жбе церко́вней приста́нище спаси́тельное обрета́ти, превы́ше бо ми́ра сия́ слу́жба есть и вво́дит в Небе́сная, иде́же А́нгелы со святы́ми воспева́ют Бо́гови: Аллилу́иа.
Икос 4
Слы́шавше лю́дие, пра́вды взыску́ющии, о́гненная словеса́ твоя́ благода́тная, пропове́дниче богоизбра́нный, в ве́ре и любви́ ко Христу́ утвержда́хуся, тебе́ же похва́льная поя́ху та́ко:
Ра́дуйся, Це́рковь бы́ти Те́ло Христово испове́давый;
ра́дуйся, чрез Та́инства к едине́нию во Христе́ призыва́вый.
Ра́дуйся, я́ко живу́щим в ми́ре до́льнем путь ко спасе́нию указу́еши;
ра́дуйся, я́ко чрез богослуже́ние с ми́ром го́рним соединя́тися ду́хом науча́еши.
Ра́дуйся, свети́льниче горя́й, на высоту́ вознесе́нный;
ра́дуйся, вети́е богодухнове́нный, уче́ние оте́ческое к пра́здником церко́вным му́дре приложи́вый.
Ра́дуйся, я́ко ду́ши на́ша све́том преми́рным просвеща́еши;
ра́дуйся, я́ко к ра́дости духо́вней нас приобща́еши.
Ра́дуйся, священному́чениче Се́ргие, па́стырю богому́дре.
Кондак 5
Богопроти́вному лжеуче́нию, еди́нство Це́ркве Христо́вой раздира́ющему, и волко́м во оде́ждах о́вчих ста́до церко́вное расхи́щающим, обре́лся еси́ защи́тник непоколеби́м догма́тов правосла́вных и после́дователь ве́рен святы́х оте́ц, небоя́зненно кова́рство лжи облича́я, Бо́га же Еди́наго в Тро́ице сла́вя: Аллилу́иа.
Икос 5
Ви́девше лю́дие ре́вность и му́жество новому́чеников и испове́дников, за чистоту́ Правосла́вия и Святу́ю Це́рковь кровь излива́ющих, гла́су со́вести сле́довати ревнова́ху, обольще́ния отверга́юще. Мы же, лука́вством ми́ра сего́ угнета́емии, твое́ю неустраши́мою ве́рностию науча́емся не малоду́шествовати, пред Бо́гом же ходи́ти, благода́рно ти вопию́ще:
Ра́дуйся, я́ко со́весть небла́зну храня́ше;
ра́дуйся, я́ко гла́су ея́ при́сно внима́ше.
Ра́дуйся, лука́вство борю́щих тя враг терпе́нием посрами́вый;
ра́дуйся, посреде́ нече́стия безбо́жна неприча́стен ему́ пожи́вый.
Ра́дуйся, Святы́я Це́ркве гони́мыя защи́тниче;
ра́дуйся, ве́ры Правосла́вныя побо́рниче.
Ра́дуйся, непоколеби́мый сто́лпе догма́тов церко́вных;
ра́дуйся, прему́дрый обличи́телю ересе́й лука́вых.
Ра́дуйся, священному́чениче Се́ргие, па́стырю богому́дре.
Кондак 6
Пропове́дник велегла́сный, сла́вный па́стырю Бо́жий, показа́лся еси́ во дни богоотсту́пничества и гоне́ния на Це́рковь Ру́сскую. Умножа́ющимся гоне́нием, усугуби́ся и ре́вность твоя́, и горе́ние ду́ха; ма́лый же храм твой ве́лия кре́пость и прибе́жище спасе́ния обре́теся, иде́же ве́рнии, торжеству́юще, воспева́ют песнь: Аллилу́иа.
Икос 6
Возсия́ све́том Боже́ственным приугото́ванный ти вене́ц му́ченический, Се́ргие досточу́дне, егда́ со смире́нием прия́т заключе́ние и изгна́ние понесе́, благодаря́ Зижди́теля. Те́мже се́рдцем умиля́ющеся, воспева́ем ти та́ко:
Ра́дуйся, в ру́це Бо́жии душу свою́ вве́ривый;
ра́дуйся, гоне́ния и ско́рби благода́рно прие́мый.
Ра́дуйся, я́ко теле́сныя своя́ боле́зни моли́твою утоля́ше;
радуйся, я́ко и на́ши боле́зни предста́тельством свои́м врачу́еши.
Ра́дуйся, блаже́нне, пра́вды ра́ди изгна́нный;
ра́дуйся, мзду на Небеси́ получи́вый.
Ра́дуйся, у́зы и рабо́ты го́рькия многоле́тне терпе́вый;
ра́дуйся, сквозь ве́лия страда́ния проше́дый и поко́я жела́ннаго дости́гнувый.
Ра́дуйся, священному́чениче Се́ргие, па́стырю богому́дре.
Кондак 7
Хотя́ ча́да своя́ духо́вная во и́стине утверди́ти, Се́ргие пресла́вне, из страны́ изгна́ния письмены́ свои́ми чистоту́ ве́ры правосла́вныя блюсти́ назида́ше я́, да сохраня́т ве́рность Це́ркви Правосла́вней. Ты же и во узи́лищи со архиере́и ве́рными, тамо стра́ждущими, ра́достно возглаша́ше Бо́гови: Аллилу́иа.
Икос 7
Но́ваго испове́дника, дре́вним подо́бнаго, дарова́ тя Госпо́дь лю́дем Свои́м, пресла́вне Се́ргие; егда́ бо в темни́це пребыва́ше, любо́вию Христо́вою всех объе́мля, возвыша́ше апо́стольски глас свой, призыва́я ве́ру храни́ти и за́поведем Госпо́дним сле́довати. Те́мже прославля́ем тя си́це:
Ра́дуйся, горя́й любо́вию ко Христу́ свети́льниче све́тлый;
ра́дуйся, святы́х испове́дник дру́же при́сный.
Ра́дуйся, ста́рец О́птинских смире́нный послу́шниче;
ра́дуйся, Святе́йшаго Патриа́рха Ти́хона ве́рный после́дователю.
Ра́дуйся, я́ко изгна́ние и у́зы прия́т смире́нно;
ра́дуйся, я́ко малоду́шных укрепля́ше духо́вно.
Ра́дуйся, я́ко Дар Ду́ха Свята́го, е́же сокрове́нное ве́дети, стяжа́;
ра́дуйся, яко по смире́нию прозорли́вость неду́гом мня́ше.
Ра́дуйся, священному́чениче Се́ргие, па́стырю богому́дре.
Кондак 8
Стра́нное чу́до ви́дим, о тебе́ исполня́емое, досточу́дне о́тче: егда́ на путь страда́ний вступи́, ко святы́м Иоа́нну Златоу́сту, Фео́дору Студи́ту, та́кожде не́когда го́рце гони́мым, усе́рдно воззва́ и, увере́ние в пра́вости пути́ своего́ получи́в, Бо́гу воспе́: Аллилу́иа.
Икос 8
Весь благода́тных дарова́ний испо́лнен, тече́ние вре́менныя жи́зни в лише́ниих соверша́я, испове́дниче сла́вный, ду́хом от си́лы в си́лу возраста́ше, от па́стырскаго бо де́лания к му́ченическому по́двигу веде́ тя Госпо́дь. Сие́ Бо́жие о тебе́ благоволе́ние сла́вяще, пое́м ти си́це:
Ра́дуйся, семена́ до́брая в сердца́ чад свои́х се́явый;
ра́дуйся, нача́тки доброде́телей в ду́шах челове́ческих слеза́ми возрасти́вый.
Ра́дуйся, плод духо́вный в ча́дех умно́живый;
ра́дуйся, ду́ши челове́ческия, я́ко зе́рна мно́зи, во еди́н хлеб купножи́тельства соедини́вый.
Ра́дуйся, се́рдце свое́ для бли́жних отве́рзый;
ра́дуйся, с ни́ми вку́пе в горни́ле страда́ний ду́хом возраста́вый.
Ра́дуйся, де́лателю Христо́в неуста́нный;
ра́дуйся, я́ко доны́не плодоно́сиши.
Ра́дуйся, священному́чениче Се́ргие, па́стырю богому́дре.
Кондак 9
Вся Небе́сная всемогу́щей Си́ле Бо́жией удиви́шася, и́бо челове́цы земни́и, на диа́вола вооружи́вшеся и пло́тию за испове́дание ве́ры му́чими, ду́хом веселя́хуся, побе́дную песнь возглаша́юще: Аллилу́иа.
Икос 9
Вети́йство челове́ческое не довле́ет воспе́ти чудеса́ Бо́жия, ра́зум челове́чь недоумева́ет пред по́двиги святы́х му́ченик, ка́ко ти́и глад, жа́жду, наготу́, бие́ние и поруга́ние, благодаря́ще Бо́га, претерпе́ша, в му́ках же и боле́знех не престаю́ще Го́спода сла́вити и бли́жним служи́ти. Ны́не же пое́м по́двиги твоя́, священному́чениче Се́ргие, с любо́вию зову́ще:
Ра́дуйся, па́ству от отца́ своего́ унасле́дивый;
ра́дуйся, ева́нгельскою любо́вию ея́ возлюби́вый.
Ра́дуйся, в заточе́нии моли́твы о па́стве умно́живый;
ра́дуйся, ду́шу свою́ за ча́да слове́сная положи́вый.
Ра́дуйся, я́ко слу́жбу Бо́гу чрез служе́ние бли́жним соверша́ше;
ра́дуйся, я́ко и ны́не ру́це моли́твенно за ны простира́еши.
Ра́дуйся, ве́рный дру́же Христо́в;
ра́дуйся, до́брый служи́телю Госпо́день.
Ра́дуйся, священному́чениче Се́ргие, па́стырю богому́дре.
Кондак 10
Спасти́ хотя́ ду́шу свою́, блаже́нне о́тче, путе́м ве́ры ше́ствоваше неукло́нно да́же до сме́рти, се́рдцем же чи́стым и смире́нным сла́вяше Го́спода непреста́нно, поя́ Ему́: Аллилу́иа.
Икос 10
Стена́ еси́ и огражде́ние необори́мое ча́дом твои́м, с ве́рою к тебе́ прибега́ющим, о́тче Се́ргие; по мно́зех ле́тех изгна́ния, ве́рен быв Бо́гови и па́стве свое́й, в ру́це Бо́жии живо́т свой предаде́, я́ко а́гнец, на заколе́ние ведо́м. Сего́ ра́ди ве́рность твою́ почита́юще, воспева́ем ти:
Ра́дуйся, чрез блаже́нную ста́рицу Ксе́нию путь свой предуве́девый;
ра́дуйся, священному́ченик то́ю пронарече́нный.
Ра́дуйся, темни́цу и сме́рть я́ко затво́р и схи́му восприя́вый;
ра́дуйся, моли́твою к тому́ себе́ приугото́вивый.
Ра́дуйся, я́ко Предте́чи Госпо́дню, обличи́телю беззако́ний, подража́ше;
ра́дуйся, я́ко в день па́мяти рождества́ его́ во у́зы заключе́н бысть.
Ра́дуйся, я́ко подо́бно Иоа́нну Предте́чи в темни́це умерщвле́н еси́;
ра́дуйся, я́ко от сме́рти к животу́ ве́чному преше́л еси́.
Ра́дуйся, священному́чениче Се́ргие, па́стырю богому́дре.
Кондак 11
Пе́нием хва́льным воспе́ти досто́ит си́лу любве́ твоея́ ко Спаси́телю, наста́вниче наш о́тче Се́ргие, я́же отри́ну дале́че страх от души́ твоея́, егда́ ду́хом бо́дренным возхожда́ше на крест. Те́мже мы, от тоя́ любве́ вма́ле вкуша́юще, всегда́ с ве́рою и любо́вию пое́м Бо́гови А́нгельски: Аллилу́иа.
Икос 11
Светода́рный свети́льник возсия́, о́тче Се́ргие, житие́ твое́; мы же, хотя́ще жи́тельству твоему́ подража́ти, твоего́ предста́тельства пред Го́сподем про́сим и с любо́вию взыва́ем ти:
Ра́дуйся, адама́нте ве́ры, лю́тых муче́ний не устраши́выйся;
ра́дуйся, вся страда́ния му́жески претерпе́вый.
Ра́дуйся, я́ко услы́ша Госпо́дь моли́твы твоя́;
ра́дуйся, я́ко из вве́ренных ти душ никто́же пострада́.
Ра́дуйся, я́ко и смерть не возмо́же разлучи́ти тя от возлю́бленных чад твои́х;
ра́дуйся, я́ко ма́лое ста́до твое́ Сами́м Го́сподем храни́мо бысть.
Ра́дуйся, я́ко не престае́ши пещи́ся о вверя́ющихся ти;
ра́дуйся, я́ко предста́тельствуеши при́сно у Престо́ла Святы́я Тро́ицы.
Ра́дуйся, священному́чениче Се́ргие, па́стырю богому́дре.
Кондак 12
Благода́ть Ду́ха Свята́го оби́льно излия́ся на главы́ ве́рных учени́к Христо́вых, да не оскуде́ет любы́ я́же к Бо́гу, гони́мым им и умерщвля́емым за Христа́; с ни́ми же и ты, священному́чениче Се́ргие, в ра́дость Го́спода я́ко ве́рный служи́тель Его́ вшел еси́, иде́же со все́ми святы́ми песнь побе́дную воспева́еши: Аллилу́иа.
Икос 12
Пою́ще хвале́бную песнь, воспева́ем страда́ния твоя́ и велича́ем тя, добропобе́дне Се́ргие, я́ко во́ина непобеди́ма, во́лею в ри́зы му́ченическия облече́нна, венце́м му́ченическим от Го́спода увенча́нна, безбо́жных гони́телей попра́вшаго, и, прекло́ньше коле́на серде́ц на́ших, со умиле́нием взыва́ем ти:
Ра́дуйся, в земли́ на́шей процветы́й цве́те благоуха́нный;
ра́дуйся, победи́телю, венце́м му́ченическим увенча́нный.
Ра́дуйся, во́ине Христо́в неустраши́мый;
ра́дуйся, Це́ркве Ру́сския украше́ние.
Ра́дуйся, к ли́ку новому́ченик сопричте́нный;
ра́дуйся, в со́нме святы́х сла́вно просла́вленный.
Ра́дуйся, земли́ Ру́сския предста́телю;
ра́дуйся, неусы́пный ея́ храни́телю.
Ра́дуйся, священному́чениче Се́ргие, па́стырю богому́дре.
Кондак 13
О усе́рдный служи́телю и му́чениче Христо́в, о́тче наш Се́ргие, приими́ от нас приноси́мое ти моле́ние и всеси́льным хода́тайством свои́м изба́ви ны от враг ви́димых, па́че же от неви́димых, не отступи́ ду́хом свои́м от нас, пребу́ди при́сно наста́вник в жизни земне́й и безпреткнове́нно вни́ти во оби́тели Небе́сныя нам помози́, да во ве́ки пое́м Бо́гови: Аллилу́иа.
Се́й конда́к глаго́ли три́жды. И па́ки чте́тся пе́рвый и́кос и конда́к пе́рвый.
Молитва
О пресла́вный священному́чениче Се́ргие, пла́менный моли́твенниче, сто́лпе Правосла́вия, па́стырю богому́дре и испове́дниче, за Христа́ страда́ния и смерть прие́мый!
Ве́руем, я́ко покрови́тель на́ш при́сный еси́ вку́пе с роди́телем свои́м пра́ведным ста́рцем Алекси́ем и попече́ния о па́стве и ны́не не оставля́еши. Сего́ ра́ди мо́лим тя: простри́ ру́ку по́мощи всем, в не́мощи и ско́рби су́щим, научи́ во единоду́шии и любви́ пребыва́ти; наипа́че же ве́чности, в та́йне богослуже́ния явля́емей, о́бщники ны сотвори́. Ве́ру правосла́вную испове́дати, гла́су со́вести сле́довати и по Бо́зе дея́ньми жи́ти помози́, да тобо́ю укрепля́еми, к го́рнему устреми́мся и Ца́рствия Небе́снаго дости́гнем, иде́же ты в со́нме новому́ченик и испове́дник Це́ркве Ру́сския непреста́нно сла́виши Всеблага́го во Святе́й Тро́ице Еди́наго Бо́га во ве́ки. Ами́нь.
